أحمد السقا يحسم الجدل: "أنا سينجل.. وباحترم طليقتي"

خلال مشاركته في منتدى قمة الإعلام العربي، خرج النجم أحمد السقا عن صمته وتحدث بصراحة عن تفاصيل طلاقه من الإعلامية مها الصغير، مؤكدًا أن العلاقة بينهما لا تزال قائمة على الاحترام والصداقة، وأن كل ما نُشر خلاف ذلك لا يمت له بصلة.

قال السقا: "أنا حاليًا سينجل، لكن ده لا ينفي احترامي الكامل لأم أولادي، بينا عِشرة وهي ست محترمة، ربت أولادنا على أحسن وجه، ولسه على تواصل ومافيش بينا مشاكل".

وأضاف خلال جلسة نقاشية أدارها الإعلامي نيشان: "في كلام كتير طالع على السوشيال ميديا ماقلتهوش، واللي بيهمني دلوقتي إن الناس تعرفني من شغلي مش من حياتي الشخصية.. الجواز والطلاق قسمة ونصيب، وأنا عايش لأولادي، نفسي أكون تريند بفيلم ناجح مش بخبر خاص بحياتي".

كما تطرّق السقا إلى رؤيته للدراما قائلًا: "الدراما لازم تكون حدوتة، وربنا خلق الكون فيه 26 تيمة بس، الفرق فيهم بيكون في الخير والشر، طول ما مفيش صراع، مفيش حياة".